Deputeti i PS, Damian Gjiknuri, në rolin e bashkëkryetarit të Komisionit të Posaçëm Parlamentar për Reformën Zgjedhore ka mbërritur ditën e sotme në Shtetet e Bashkuara të Amerikës në kuadër të një delegacioni të Kuvendit të Shqipërisë.
Lajmi është bërë i ditur nga vetë Gjiknuri përmes një postimi në rrjete sociale ku shihet i shoqëruar nga ambasadori i Shqipërisë në SHBA, Ervin Bushati.
Së bashku ata kanë zhvilluar një takim me kongresmenin Jim Himes, ku kanë diskutuar mbi reformën zgjedhore.
“Nisur nga interesimi i tij rreth votës së diasporës, e informova kongresmenin në lidhje me ecurinë e reformës zgjedhore në Shqipëri dhe garantimin në ligj të kësaj të drejte për shtetasit shqiptarë që jetojnë jashtë territorit tonë. Gjithashtu e njoha me përpjekjet e përbashkëta për të mbushur çdo boshllëk legjislativ në lidhje me këtë të drejtë të sanksionuar në Kodin Zgjedhor.
Me rëndësi thelbësore miratimi i një metode votimi nga jashtë që siguron integritet dhe llogaridhënie administrative për këtë proces sa të rëndësishëm aq edhe sfidues. U angazhova të informoj në vijimësi Kongresin në lidhje me ecurinë e këtij procesi edhe në kuadër të interesimit të shumë organizatave dhe qytetarëve shqiptarë që jetojnë dhe punojnë në Shtetet e Bashkuara të Amerikës”, shkruan Gjiknuri në një postim në Facebook./Opinion.al
