Ditën e sotme Sekretari i Përgjithshëm i PS-së Damian Gjiknuri së bashku me kryebashkiakun Gledian Llatja zhvilluan një bashkëbisedim me banorët e lagjes “Katund i vjetër” në Njësinë Administrative Shushicë.
Edhe pse ende nuk ka nisur zyrtarisht fushata zgjedhore, Gjiknuri ka kërkuar votën e qytetarëve më 14 maj, duke thënë se PS është alternativa më e mirë në krahasim me forcat e tjera politike.
Gjiknuri nuk i kurseu sulmet ndaj opozitës dhe kandidatit të PD, Luçiano Boçi, për të cilin tha se kur të fillojë fusha do të mashtrojë dhe se ndër vite nuk ka punuar për qytetarët.
“Ne do bëjmë ç’mos që t’u qëndrojmë pranë për problematikat. Në fushatë zgjedhore do vijë dhe ai krahu tjetër, do premtojë, do mashtrojë. Se s’kanë çfarë bëjnë ata. E vetmja gjë që do thonë ata është: do ta bëj unë. Se ai që s’ka bërë asgjë e ka kollaj kur s’ka gjë në dorë. Ai që është nga krahu tjetër ka qenë kryetar PD-je, ka qenë kandidat për kryetar bashkie, ka qenë në pushtet kur ishte PD-ja, të gjitha i kishte në dorë. Asgjë nuk bëri”, deklaroi Gjiknuri.
Gjiknuri tha se Berisha dhe Meta nuk kanë asnjë alternativë zhvillimi.
“Mos e shpërdoroni votën kot. Krahu tjetër e dëgjoni çfarë thonë në televizion, përmbysje thonë, revolucion, asnjë gjë tjetër. Asnjë alternativë zhvillimi. Pra, Berisha me Metën janë bërë bashkë për t’u rikthyer prapë në pushtet. Unë jam i bindur që shqiptarët i kanë hedhur në koshin e historisë. Shqiptarët meritojnë më shumë”,-tha Gjiknuri.
