Përfaqësuesi i mazhorancës në Këshillin Politik, Damian Gjiknuri ka folur për hapjen e listave.
“Për tu përshendetur fakti që po diskutohet për risitë kushtetuese për hapjen e listave. Ka rëndësi që opozita u rikthye në negociata, fatkeqësisht duke humbur kohë. Cështja e aleatëve, dhe koalicioneve, le të zgjedhin modele aktuale perëndimore. Kodi Zgjedhor i ka mundësitë që ti detajojmë të gjitha rregullat. Hapja e listave ka sfida të mëdha administrative, prandaj duhet kujdes për mënyrën se si formohen koalicionet. Le të gjejnë modele perëndimore që kanë lista të hapura dhe koalicione të tilla zgjedhore. Risia më e madhe e ndryshimeve kushtetuese është hapja e listave. Edhe unë kam pasur skepticizmin tim, por në fund triumfon vullneti i shumicës”, tha Gjiknuri.
“Gjithcka është e mundur, dhe hapja 100% e listave,”, shtoi ai.
Gjiknuri theksoi se është e rëndësishme që ndryshimet kushtetuese të miratohen në seancën e 30 korrikut ndërsa detajet do të dakordësohen mes palëve pas kësaj date, përmes kodit zgjedhor.
