Qytetarja Esmeralda Mici, tregon se jeton në Itali, por para dy vjetësh hapi një kopsht privat në Kamëz. Ajo kërkon që ta dhurojë bazën materiale për një kopsht që ka nevojë.
Esmeralda Mici: Arsyeja përse i jam drejtuar emisionit tuaj është, që unë dua të dhuroj bazë materiale të një kopshti privat që unë e kam pasur më përpara, në momentin që kam qenë në Shqipëri. Për arsye emigrimi, unë e kam mbyllur atë biznes dhe dëshira ime më e madhe është që të gjithë këtë bazë materiale, unë ta dhuroj. Dhe jam drejtuar tek ju. I vë në dispozicion të gjitha, duke filluar që tek krevatet, 11 copë. Karrige janë diku tek 30 copë, tavolina janë 3 të mëdha, mund të qëndrojnë diku tek 8 fëmijë dhe 3 tavolina të vogla. Gjithashtu, vë në dispozicion dhe 3 dollapë, që janë të kopshtit. Një raft shumë i madh, i gjatë, për të vendosur lodrat. Vë në dispozicion të gjithë bazën materiale didaktike. Është një bazë materiale që ka qenë e një kopshti të kompletuar nga të gjitha drejtimet dhe unë këtë dua ta dhuroj për një kopsht, ku ju ta shihni të arsyeshme, që vërtetë atje ka nevojë.
Ne i verifikojmë pajisjet, që janë të shumta, nga krevatët e tavolinat e deri te lojrat e mësimet didaktike. Për më tepër të gjitha janë në gjendje shumë të mirë.
Pas interesimit, ne e çojmë bazën materiale nga Kamza në Njësinë administrative Manzë, në një kopsht, që është rindërtuar pas tërmetit e do të mbushet më fëmijë në Mars 2024./ Tv Klan
