Parlamenti gjerman nuk mbajti një seancë mbi mbështetjen për hapjen e negociatave me Maqedoninë e Veriut dhe Shqipërinë, duke mos i dhënë mandat qeverisë për të miratuar hapjen e negociatave me të dy vendet këtë muaj, raporton Balkan Insight. Meqenëse deputetët do të marrin pushimet verore, mundësia më e shpejtë për vendimin do të paraqitet në shtator.
Sipas Këshillit të Politikave të Demokratizimit (DPC), forum me qendër në Berlin, grupi parlamentar i CDU / CSU deklaroi se nuk kishte kohë të mjaftueshme për të shqyrtuar raportet e Komisionit Evropian për Maqedoninë e Veriut dhe Shqipërinë për seancën parlamentare të kësaj jave, e fundit para samitit të BE-së me 20-21 qershor.
DPC pohoi gjithashtu se grupi parlamentar është kundra integrimit të Shqipërisë dhe se një zgjidhje e përbashkët duhet të mbajë parasysh ndarjen e çështjes së Maqedonisë Veriore dhe Shqipërisë, duke i dhënë dritën jeshile Maqedonisë, pasi reformat e tij u vlerësuan më pozitivisht nga Komisioni Evropian.
Më herët mediat gjermane raportuan se kancelarja gjermane Angela Merkel, i ka bërë një refuzim të qartë kërkesës së Komisionit Europian për hapje të shpejtë të negociatave të anëtarësimit me Shqipërinë dhe Maqedoninë e Veriut.
Këtë ajo e ka thënë në një seancë të komisionit parlamentar të Bundestagut për Europën, sipas “Süddeutsche Zeitung”.
“Deutsche welle” sjell në vëmendje se me këtë kancelarja del qartazi kundër partnerit në koalicion, Partisë Socialdemokrate, SPD, që përkrah votimin pro për hapjen e negociatave në Këshillin e BE më 18 qershor.
Ministri gjerman i Shtetit për Europën në Ministrinë e Jashtme, Michael Roth (SPD) është një nga politikanët gjermanë që është angazhuar fort javët e fundit për hapjen e negociatave me dy vendet e Ballkanit./ Opinion.al
