Deputetja e Partisë Demokratike, Dhurata Çupi, përmes një statusi në rrjetin social “Facebook”, ka shpjeguar rastet kur Komisionet Parlamentare mblidhen online.
Sipas deputetes demokrate, Rregullorja e Kuvendit përcakton se Komisionet mblidhen online në rastet e masave të jashtëzakonshme, përkatësisht gjendjes së luftës, apo fatkeqësisë natyrore.
“Rregullorja e Kuvendit përcakton se komisionet parlamentare i zhvillojnë mbledhjet online vetëm në rastet e masave të jashtëzakonshme, përkatësisht gjendjes së luftës, gjendjes së jashtëzakonshme apo fatkeqësisë natyrore (neni a/5). Zhvillimi i mbledhjeve online vendoset me mirëkuptim nga Konferenca e Kryetarëve (neni 6).
Megjithëse, fatmirësisht Shqipëria nuk është në asnjë prej rasteve të masave të jashtëzakonshme, mazhoranca socialiste, në shkelje flagrante të Rregullores së Kuvendit dhe pa vendim të Konferencës së Kryetarëve, ka vendosur zhvillimin e mbledhjeve të komisioneve parlamentare online, me qëllim të vetëm shuarjen e zërit të opozitës në Parlament”-shkruan Çupi në Facebook.
Mazhoranca po zhvillon online mbledhjet e komisioneve Parlamentare pasi opozita po pengon zhvillimin normal të mbledhjeve.
