“Unë jam Landi. Po mbytemi. Nuk kam më kohë. Jorgjita të kujdeset për fëmijët. Lekët i keni tek pllaka e fundit në banjo”
Kjo leter është gjetur sot nga Policia e Vlorës gjatë kontrolleve për gjetjen e dy personave të zhdukur në det. Policia kufitare në afërsi zonës së Zvërnecit ka gjetur brenda në varkë këtë dorëshkrim i cili ishte mbështjellë dhe vendosur në shishe. Identiteti i plotë i personit që ka lënë këtë mesazh nuk është bërë ende i ditur sepse nuk ka as denoncim nga familjaret e tij.
Ndërkohë, që prej të premtes është denoncuar zhdukja e nje tjeter te riu në Vlorë: 32-vjeçarit Santo Ymeraj. Familjaret e tij janë shprehur se “Santo ka dalë në det ditën e enjte në mbrëmje rreth orës 22:30 me një motor uji dhe komunikimin me familjarët e tij e ka bërë në orën 01:30 minuta të së premtes. Santo Ymeraj, është shprehur në tel me familjarët e tij, se “nuk po shikoj asgjë, deti ka shumë dallgë dhe errësirë e madhe, rrezikoj të mbytem”.
Ndërkohë që policia e Vlorës ka nisur kërkimet që nga dita e premte dhe deri më sot , asnjë shenjë jetë për 32-vjeçarin.
Burime nga policia e Vlorës thonë se ka dyshime që dy personat të kenë qenë bashkë dhe janë mbytur në rrethana të paqarta. Policia kufitare ka kërkuar edhe ndihmën e Guardia di Finanzes italiane për të gjetur trupat.
