Prezantuesi i njohur britanik i BBC, Michael Mosley është gjetur i vdekur në Greqi.
Mediat greke bëjnë të ditur se trupi i tij u gjet në det në ishullin Symi.
Ai ishte zhdukur prej të mërkurës, kur dhe nisën hetimet nga autoritetet greke. Kërkimet ishin fokusuar pikërisht në këtë ishull.
Trupi i pajetë i 67-vjeçarit u gjet në një shpellë, që konsiderohet e rrezikshme për të hyrë.
Lefteris Papakalodoukas kryetari i Bashkisë Symi tha:
“Shkuam me një varkë në një shpellë në Agia Marina pasi kishim informacion se një person është aty dhe mund të ketë rënë. Teksa ishim rrugës me kamera, pamë një objekt 10 metra larg plazhit. Domethënë, britaniku arriti në destinacionin e tij, por pak metra para se të mbërrinte ai u rrëzua dhe u vra.”
Policia greke kishte njoftuar ditë më parë se Mosley ishte nisur për një shëtitje në qendër të ishullit dhe pastaj humbi kontaktet me bashkëshorten e tij e cila ngriti alarmin për zhdukjen.
67-vjeçari ishte i njohur për programet, duke përfshirë programin e BBC-së ‘Trust Me’, ‘I’m a Doctor’ dhe paraqitjet në ‘The One Show’ të BBC-së dhe ‘This Morning’ në ITV.
