Një shtetas nigerian është gjetur i plagosur me armë zjarri në kufirin shqiptaro – grek nga Policia Shqiptare, ndërsa mbeten të pa qarta rrethanat në të cilat ai është qëlluar.
Burime të spitalit civil të Gjirokastrës thonë se 30 – vjeçari është shoqëruar në spital nga repartet policore të DELTA FORCE, që patrullojnë këto ditë kufirin.
Sipas këtyre burimeve, i plagosuri ka marrë ndihmën mjekësore dhe ndodhet jashtë rrezikut për jetën. Policia nuk ka dhënë hollësi për ngjarjen, por dyshohet se shtetasi nigerian është futur nga kufiri grek i plagosur.
Autoritet shqiptare, prej disa javësh kanë përforcuar masat në kufirin me Greqinë për të parandaluar një trafik të mundshëm refugjatësh. Grupe të vogla dhe sporadike të emigranëve sirianë janë bllokuar gjatë muajve të fundit nga forcat policore shqiptare dhe më pas janë riatdhesuar drejt territorit grek.
Në zonat veriore greke, fqinje me Shqipërinë, janë vendosur rreth 3 mijë refugjatë, kryesisht nga Siria. Pjesa dërrmuese e tyre jetojnë në një kamp me çadra, në periferi të Janinës në kushte mjaft të vështira.
Grupe emigrantësh në këtë kamp bllokuan pak ditë më parë një autostradë që lidh Janinën me zonën bregdetare të Gumenicës, duke sulmuar me mjete të forta policinë, që kërkoi zhbllokimin e rrugës./Klan
