Foto: Viktima Fabiol Kycyku
Dy të rinj shqiptarë janë gjetur të vdekur në një gurore të braktisur në komunën Acquasanta në provincën e La Spezias në Itali. Njëri prej tyre është identifikuar, Fabiol Kycyku 19 vjeç. Familjarët e kishin denoncuar të humbur që prej së dielës. Emri i viktimës së dytë ende nuk dihet.
Nga hetimet paraprake dyshohet se dy të rinjtë kanë humbur jetën rreth 3 ditë më parë në mënyrë aksidentale duke rënë nga një lartësi prej 40 metrash nga rruga bregdetare që çon në vendin turistik “Cinque terre”, por janë gjetur pasditen e së mërkurës.
Në trupat e tyre nuk janë gjetur shenja dhune ose plagë të shkaktuara nga armë zjarri apo armë të ftohta, ndaj dyshohet për vdekje aksidentale.
Sipas hetimeve të para dy shqiptarët kanë humbur jetën pasi kanë rënë nga lartësia. Ata dyshohet se kishin tentuar të grabisin një banesë pranë vendngjarjes.
Ka qenë një miku i tyre po shqiptar i cili ka dhënë alarmin e kërkimit të trupave të tyre në atë zonë pasi e dinte se dy të rinjtë do të kryenin një vjedhje banese në atë territor.
Sipas hetuesve të çështjes Antonio Patrono e Federica Mariucci ky fakt është konfirmuar dhe nga sipërmarrësi ndërtues italian Antonino Sciacca, i cili ka deklaruar se natën e zhdukjes së dy të rinjve, dy persona kanë tentuar të grabisin vilën e tij mjaft pranë gurores së braktisur.
Pronarët e shtëpisë kanë dëgjuar zhurmë e sapo kanë ndezuar dritën kanë parë dy njerëz të largohen me shpejtësi jashtë banesës.
Supozohet se dy të rinjtë shqiptarë për shkak të errësirës kanë kapërcyer gardhin e gurores duke menduar se do të hynin në një zonë pyjore.
