Deputeti demokrat Agron Gjekmarkaj në fjalën e tij në Parlament,i cilësoi zgjedhjet e 11 majit asgjë tjetër veçse një farsë elektorale.
“Sot nuk ngrihem në këtë foltore për të komentuar një rezultat, por për të denoncuar një farsë. Zgjedhjet e 11 majit nuk ishin as të lira, as të ndershme, as përfaqësuese. Një teatër pushteti, PS, partia-shtet, qeveria-shtet, kryeministri-shtet, organizuan një proces të mbyllur ku çdo element ishte i komanduar politikisht”, tha ai.
Shumicë parlamentare iu drejtua duke u thënë se ata janë kthyer në zbatues urdhrash të një personi të vetëm që po minon demokracinë, referuar kryeministrit Edi Rama.
“Secili prej jush i ka hequr vetes garancitë sublime që pluralizmi i garanton një shoqërie. Po vraponi drejt së panjohurës me një naivitet të frikshëm, jeni në pritje të urdhrave nga një person i vetëm. Ju po e vrisni Republikën nga frika! Duke hequr dorë nga liria juaj dhe pluralizmi, po vini në rrezik Shqipërinë.”
“Ju nuk mundët Partinë Demokratike, ju mundët Shqipërinë për një çast historik! Keni ndalur qarkullimin e ideve, keni cenuar dinjitetin e qytetarëve. Keni shkelur barazinë para ligjit…”, shtoi ai.
Deputeti i PD shtoi se “asnjë pushtet nuk zgjat përgjithmonë, e asnjë popull nuk hesht përgjithmonë”, duke theksuar se këto zgjedhje zhbënë demokracinë. “Reflektoni e reagoni!“, përfundoi Gjekmarkaj.
