Deputeti i PD-së, Agron Gjekmarkaj, ka hedhur akuza ndaj qeverisë së kryeministrit Edi Rama.
Nga foltorja e Kuvendit, Gjekmarkaj theksoi se Arben Ahmetaj ishte pikërisht personi që zgjodhi Rama si numrin dy të qeverisë.
“Kam besuar dhe ende besoj që PS është aset kombëtar. Unë jam vetëm një individ përballë zërave publik që kërkojnë që e gjithë trupa politike në qendër dhe bazë të hetohet për lidhje të grupit të organizuar. Kush jeni? Partia që matet elektoralisht me kundërshtarët apo partia e atyre të EncroChat -it. Kush jeni, ata që marrin urdhra natën për t’i dridhur ditën?
Kush jeni partia që i djeg plehrat në incenetator apo incenetatori që djeg paratë dhe lë plehrat. Dikush ikën, dikush përshtatet, dikush hesht. Disa dorëzohen, disa rrinë. Aman pushoni pak o burrë, një herë që vjen 5 minuta. Demokraci ka kur qeveria ka frikë nga populli.
S’kam pasur respekt për Arben Ahmetaj për tipologjinë e tij, apo për vanitetin e thellë adoleshentesk, apo servilizmin e shtyrë për karrierë, por ndoshta për këto cilësi ai u bë nr 2 i qeverisë së Ramës. Rama për çdo deklaratë të tij ka përgjegjësi morale. Snobimi tregon përmasën e sikletit. Kush është shefi juaj? Bosi i lokalit apo kryeministri global? Kartelet apo paraja e tyre që blen vota?”, tha ai.
