Rikthehet ligji i importit të mbetjeve për riciklim me disa ndryshime.
Kështu do të ndalohet importi i mbetjeve për djegie, do të importohen vetëm mbetjet e ngurta të cilat do të përdoren si lëndë e dytë ricikluese, importin do ta kryejnë vetëm ata që kanë infrastrukturën e nevojshme për riciklim.
Sipas nismëtarit për kthimin e ligjit për importin e mbetjeve të riciklueshme, Eduard Shalsi, importi do të bëhet në dy ose tre pika doganore të cilat do të kenë kapacitetet e nevojshme kontrolluese.
Deputeti Genc Ruli, anëtari i djathtë i Komisionit Parlamentar të Veprimtarisë Prodhuese u shpreh se riciklimi duhet të bëhet dhe është i nevojshëm, edhe pse pozita ka rikthyer një ligj që më para ishte votuar nga Partia Demokratike.
E pranishme në diskutime ishte edhe deputetja Mimoza Hafizi e cila bëri thirrje që ky projekt ligj të mos votohet.
Projketligji parashikon edhe rritje të masës së gjobave për abuzuesit, ata që importojnë lëndë të rrezikshme do të gjobiten me tre milionë lekë nga një milionë që ishte më parë.
Sa u përket atyre që importojnë lëndë jo të rrezikshme, por që nuk ua lejon ligji do të gjobiten me dy milionë lekë nga 1.5 milionë që ishte më parë.
