Këtë të mërkurë pritet të mbahet seanca e radhës për ish-ministrin e Mbrojtjes, Fatmir Mediu në lidhje me çështjen ‘Gërdeci’.
Mediu, i shoqëruar nga avokati i tij, ka hyrë në ambientet e GJKKO-së.
Sot është parashikuar që të vijojë thirrja në gjyq e dëshmitarëve për tragjedinë që i mori jetën 26 personave dhe plagosi qindra të tjerë.
Gjykata kundër korrupsionit dhe Krimit të Organizuar ka thirrur 71 dëshmitarë në gjyqin për shpërthimin e fabrikës së demontimit në Gërdec. Deri tani janë pyetur 40 prej tyre, zyrtarë dhe familjarë të viktimave apo personat të prekur nga tragjedia e 15 marsit 2008.
Në seancën e kaluar (27 dhjetor) dëshmoi edhe djali i ish-kryeministrit Sali Berisha, Shkëlzen Berisha.
Ish-ministri i Mbrojtjes, Fatmir Mediu po gjykohet në GJKKO për çështjen “Gërdeci” për dy akuza atë të “Shpërdorimit të Detyrës” dhe “Shpërdorim i detyrës në bashkëpunim me subjekt ushtarak-kuadër komandues”.
