Nga Desada METAJ- Edhe kur gjendet konsensusi, palët në Shqipëri në mos mburren, akuzojnë njëra tjetrën për pengesa që realisht nuk është se nuk kanë ekzistuar. Kështu ndodhi dhe sot me daljet publike të dy kryetarëve, Basha dhe Rama.
I pari, Kryetari i opozitës mbajti një fjalim triumfues bashkë me një telefonatë me kancelaren Merkel. Sipas kreut të demokratëve, “Konkludimi i dy çështjeve të lëna si litar jashtë në negociatën e së hënës, është edhe konkludimi me sukses i betejës së PD-së për një draft kushtetues në përputhje me Venecian, bazuar mbi propozimin e ndihmës sekretares Nuland”.
Vetëm pak pas tij, Kryeministri Rama nuk e humbi mundësinë të dilte dhe ai live ne Tv për ti thënë shqiptarëve se askush më shumë se PS nuk ka qenë pro reformës.
“Dua të ndaj me ju faktin se ky është drafti i reformës kushtetuese dhe në këtë draft nuk lëviz absolutisht asgjë për sa i përket dy çështjeve që mbajtën peng këtë proces deri në këtë orë të fundit” – deklaroi Kryeministri duke na i bërë edhe më të paqartë pjesën e kundërshtive që patën negociatorët gjatë ditëve të fundit.
Tani që reforma pret vetëm votën formale në parlament, pak-kush di të thotë me saktësi se për çfarë realisht i kishin mosmarrveshjet 2 partitë e mëdha këto orët e fundit. Nëse kanë qenë dakort, ateherë pse u zgjat kaq shumë me pikat kaq të përfolura të nenit 88? A ka ndikuar në këtë stërzgjatje prezenca e ndërkombëtarëve në negociata?
Këto janë pyetje në fakt që nuk gjejne dot përgjigje në vorbullën e marrjes së lavdisë për arritjen e konsensusit. Ndoshta më vonë, kur gjithçka t’i rikthehet rutinës së përditshme, dikush do të gjejë kohën dhe mundësinë të na tregojë se çfarë realisht e pengoi këtë reformë dhe çfarë deshën apo nuk deshën palët të tregojnë.
Deri atëherë, simpatizantët e të dy kampeve do të lëvdojnë liderët përkatës për “fitore”, duke lënë në mëdyshje mendjet e ftohta:
Gënjeu Rama apo Basha për konsensusin?
*Desada Metaj / Kryeredaktore e “Opinion”
