Detaje të reja ka dhënë në emisionin “Opinion” gazetari Merin Maçi nga operacioni i arrestimit të Aldo Avdyli të shumëkërkuarit me rrezikshmëri të lartë, i cili u kap pas një ndjekjeje disa mujore nga policia.
Avdyli , sipas gazetarit kishte rreth katër muaj që fshihej në një apartament në zonën e Liqenit të Thatë, i marrë me qira nga një mik i tij, që po ashtu është vënë në pranga nga policia.
Gazetari theksoi se 33-vjeçari nuk kishte dalë nga banesa gjatë gjithë kësaj kohe, ndërsa dyshohet se konsumonte lëndë narkotike, pasi në vendngjarje janë gjetur mbetje droge.
Gazetari shtoi se në momentin e ndërhyrjes, Avdyli tentoi të largohej nga pjesa e pasme e apartamentit, por sapo kuptoi se ishte i rrethuar nga të gjitha anët, i bëri me shenjë policisë për t’u vetëdorëzuar.
“Ishte një person që policia e Durrësit kishte dy vite që e kishte vënë nën ndjekje. Kanë dështuar disa operacione, pasi ky individ ishte gjithmonë një hap përpara policisë dhe kishte informacion të saktë për lëvizjet e tyre. Këtë herë, falë ndjekjes së vazhdueshme dhe mbikëqyrjes së apartamentit, policia arriti ta lokalizojë dhe ta arrestojë. Në momentin që pa forcat e policisë, tentoi të dilte nga dritarja, por u dorëzua. Ishte i armatosur dhe i vetmi veprim që bëri ishte të thyente telefonin e tij për të fshehur informacionet. Megjithatë, telefoni është dërguar në laboratorin e kriminalistikës dhe po analizohet për të rikuperuar të dhënat,” tha ai.
Aldo Avdyli ishte shpallur në kërkim për vrasjen e Edmir Bregut në vitin 2021 dhe për përfshirje në grupe të strukturuara kriminale, ndërsa policia po vijon hetimet për lidhjet e tij me persona të tjerë të botës së krimit.
