Gazetari Poli Hoxha, të martën, deklaroi se nëse Klement Balili do të kapej nga policia para se dosja e tij të dorëzohej në Gjykatë, ai do të ekstradohej në Greqi.
“Këta prisnin një letër-porosi nga Greqia dhe ajo letër ka vetëm një akuzë: 670 kg kanabis, i kanë futur edhe grup i strukturuar kriminal dhe pastrim parash. Kjo dosje pasi erdhi me shpejtësi shkoi në gjykatë dhe në këtë moment Klement Balili është dorëzuar. Nëse policia do ta kishte kapur, ai do ishte ekstraduar në Greqi”, – tha Hoxha në studion e ‘Opinion’.
Dorëzimi i tij vjen pikërisht në kohën kur dhe Prokuroria për Krimet e Rënda sapo ka mbyllur hetimet dhe ka dërguar dosjen për gjykim. Ai akuzohet për “trafikim të lëndëve narkotike”, i kryer në bashkëpunim, në formën e grupit të strukturuar kriminal, “pjesëmarrje në grupin e strukturuar kriminal”, “Refuzim për deklarim, mosdeklarim, fshehje ose deklarim i rremë i pasurive”, si dhe për “pastrim parash”.
Emri i Balilit doli gjatë një hetimi, i cili u finalizua në fillim të muajit maj të vitit 2016, me një operacion të ndërmarrë nga autoritetet greke në bashkëpunim me DEA-n amerikane, ku u sekuestruan mbi 670 kilogram marijuhanë në ishullin Zakintos në Greqinë lindore.
Në këtë operacion u përfshi dhe policia shqiptare si dhe autoritetet e disa vendeve të Bashkimit Europian, ku dyshohet të ketë shtrirë rrjetin e trafikut organizata, një prej krerëve të së cilës dyshohet të jetë Klement Balili, i përkufizuar nga mediat greke si “Eskobari i Ballkanit”.
