Vera ka ardhur pak me vonesë thonë meteorologët, por me vrull. Në parashikimin për “Aldo Morning Show” në Tv Klan sesi do të jetë moti përgjatë qershorit, Hakil Osmani lajmëron se na presin ditë të nxehta.
Që në dhjetë ditët e para dhe nga mesi i kësaj jave, temperaturat arrijnë deri në 37 gradë Celsius për shkak të një vale të nxehti nga Afrika.
Hakil Osmani: Qershori, këtë dhjetëditësh të parë parashikohet të ketë temperatura të larta ku mesi i kësaj jave do të sjellë valët e të nxehtit në Europën jugore duke bërë që të preket dhe territori shqiptar.
Aldo: Nga vjen kjo?
Hakil Osmani: Vjen nga Afrika dhe sjell temperatura shumë më të larta sesa vlerat normale, normale janë te 30, ndërsa maksimumet pritet që gjatë kësaj vale do të jenë rreth 36-37 gradë Celsius, temperatura këto të matura në hije pasi nëse ne qëndrojmë në diell, i ndiejmë edhe 3 apo 4 gradë më të larta.
Pas kësaj vale që do të zgjasë rreth 3-4 ditë, temperaturat do të pësojnë një rënie të lehtë në 33-34 gradë Celsius. Gjithashtu, do të shënojnë rritje në orët e mëngjesit.
Hakil Osmani: Për fat të mirë, pritet të kemi edhe një rritje të temperaturave në orët e para të mëngjesit.
Aldo: Pse për fat të mirë?
Hakil Osmani: Po për ata që duan të shkojnë në plazh, mund ta shijojnë edhe përgjatë pasditeve pasi kanë qenë relativisht të freskëta pasditet dhe nga vlerat 6-7 gradë Celsius që ka nisur qershori, parashikohet që pjesa e dytë e kësaj jave të sjellë temperatura që në zonat malore të jenë 11-12 gradë Celsius, në qytetet e zonës malore. Po ashtu, edhe në ultësirën perëndimore do të kemi temperatura të cilat luhaten nga 14-19 gradë Celsius në vijën bregdetare. Pra pritet që të kemi temperatura mjaft të larta këtë dhjetëditësh të parë.
Gjatë dhjetëditëshit të dytë të qershorit, temperaturat shkojnë maksimalisht në 32 gradë.
Hakil Osmani: Kemi sinjale të mira në dhjetëditëshin e dytë pasi pritet që të kemi freskime relative, një rënie të temperaturave të ajrit. Pritet që të kemi maksimume që do të jenë rreth vlerës 30-32 gradë Celsius, do të ketë ndonjë ditë që do të jetë në vlerën 29 gradë Celsius.
Aldo: Çfarë zonash kemi më të nxehta?
Hakil Osmani: Zona më e nxehtë gjatë stinës së verës janë kryesisht qytetet e zonës së ulët duke nisur nga Shkodra, Tirana, Berati, Gjirokastra.
Muaji qershor do të jetë i thatë, me episode të shkurtra rrebeshesh.
Hakil Osmani: Thatësira, nëse flasim për të, sigurisht që do të jetë prezent gjatë kësaj stine vere në territorin shqiptar pasi të paktën qershori pritet të ketë mungesë sa u përket reshjeve në vendin tonë. Sigurisht do të ketë episode ku do të kemi prezente rrebeshe shiu që do të zgjasin nga dhjetë minuta deri në gjysmë ore. Qytetet më të prekura nga këto episode do të jenë Korça, Pogradeci dhe Erseka./tvklan.al
