Aventura e Shkëlzen Gashit përtej Atlantikut me fanellën e Colorado Rapids do të startojë gjatë këtij muaji me 4 ndeshjet miqësore në prag të sezonit të ri në Major League Soccer që starton në datën 6 Mars.
Sulmuesi shqiptar është bashkuar me ekipin amerikan disa javë më parë, por zyrtarisht do të zbresë në fushë në ndeshjet miqësore që Colorado ka planifikuar deri në datën 27 Shkurt.
Trajneri Pablo Mastroeni e ka projektuar bomberin kuqezi në formacionin bazë dhe sipas mediave amerikane, Gashi është një prej lojtarëve që do ta nisë sezonin nga fusha e blertë. Ajo që bie në sy në formacionin e ndërtuar nga mediat pranë skuadrës së Colorados, është fakti se 10 nga 11 titullarët janë afrime të merkatos së muajve të fundit., raporton Supersport.al
Colorado ka shpenzuar shuma të mëdha për ndërtimin e një skuadre konkurruese në futbollin amerikan duke afruar një numër të madh lojtarësh me eksperiencë. Gashi është një prej transferimeve më të bujshme në futbollin amerikan gjatë merkatos së dimrit.
Ai është cilësuar si një nga lojtarët më të mirë të kontinentit të vjetër që me ekseperiencën dhe klasin e tij do të ndihmojë Major League Soccer të rritet edhe më shumë në të ardhmen.
