Një efektiv i Gardës së Republikës ka pranuar në formularin e vetëdeklarimit se ka përdorur aplikacionet e kriptuara.
Pyetjes nëse keni qenë përdorues i Sky ECC, një efektiv i Gardës i është përgjigjur pozitivisht.
Por ende nuk dihet arsyet që ai ka dhënë në formular se për çfarë qëllimi e ka përdorur. Burime pranë Agjencisë së Mbikëqyrjes Policore bëjnë me dije për Klan News se efektivi është në fazë të verifikimit të mënyrës si e ka përdorur dhe qëllimin e tij. Në përfundim të hetimeve pritet të vendoset nëse do të ketë përjashtim përfundimtar nga Garda.
Të njëjtat burime bëjnë me dije se dyshimet e AMP-së janë edhe për plotësim të gabuar të këtij formulari dhe efektivi i Gardës të mos e ketë kuptuar qartë pyetjen.
Gjithsesi, verifikimi i thelluar do të qartësojë si qëndron situata. Punonjësi i Gardës është i pari nga rreth 13 mijë punonjës të policisë Gardës dhe Agjencisë së Mbikëqyrjes Policore, që ka pranuar se ka përdorur aplikacionet e enkriptuar.
Sky ECC dhe Encrochat nuk janë platforma të paligjshme në vetvete, por në pjesën dërrmuese të rasteve janë përdorur nga persona me rekorde kriminale. Të dy aplikacionet kanë një kosto të caktuar për përdorimin e tyre dhe jo çdo person ka mundësin ekomomike për t’i përdorur.
Aplikacionet Sky Ecc dhe Encrochat u zbërthyen nga autoritetet belge, holandeze dhe franceze në bashkëpunim me Europol, në Mars të 2021. Në disa çështje që SPAK ka nën hetim rezultonin të përfshirë edhe punonjës të policisë.
Për këtë shkak ministri i Brendshëm Taulant Balla miratoi një urdhër, për të gjithë punonjësit e policisë, gardës dhe APM, për të deklaruar nëse i kanë pasur këto dy aplikacione dhe qëllimin e përdorimit. Sipas urdhrit të Ballës çdo punonjës që kishte përdorur aplikacionet e koduara do të përjashtohet menjëherë nga puna.
Po ashtu, Klan News raporton se Gramos Sako, Komandanti i Gardës së Republikës është liruar nga detyra. Ende nuk dihen shkaqet e lirimit të tij dhe deri më tani nuk ka një konfirmim zyrtar nga Ministria e Brendshme.
