Ish-kryeministri, Sali Berisha, ka mbërritur mëngjesin e sotëm në ambientet e Kryesisë së Kuvendit, ku garda është bërë gardh tek hyrja e Kryesisë.
Në një prononcim për gazetarët, Berisha u shpreh se asgjë s’do të mund të ndalë protestën e deputetëve të opozitës, të cilët sipas tij, janë gatshëm për sakrifica të mëdha në mbrojtje të të drejtave kushtetuese.
“Asgjë s’do të mund të ndalë protestën e deputetëve të opozitës në mbrojtje gjer në sakrifica të mëdha, të të drejtave kushtetuese.
Akti i djeshëm regjistrohet si akti më i turpshëm në historinë e një Parlamenti, ku Rama urdhëroi Lindën e Parlamentit të mbyllë me dry dyert e Parlamentit në të cilët ata janë anëtarë dhe kanë imunitetin e tyre, Këto akte tregojnë degradimin ekstrem të një regjimit”-tha Berisha.
Kujtojmë se ditën e djeshme, Garda ndaloi hyrjen e deputetëve të përjashtuar të opozitës të futeshin brenda ambienteve të godinës, ndërsa këta të fundit reaguan duke u futur brenda nga dritarja e një prej zyrave të Kuvendit.
