Kryeministri Edi Rama ishte i pranishëm sot në Konferencën Rajonale “Përshpejtimi i Reformave të Kujdesit për Fëmijët drejt Anëtarësimit në Bashkimin Evropian”, ku morën pjesë edhe përfaqësues të vendeve të Ballkanit Perëndimor.
Ai tregoi rëndësinë e këtij aktiviteti, duke e quajtur “një përgjigje kuptimplotë për ata që pyesin se për çfarë duhet Bashkimi Europian”.
“Një aktivitet i tillë që ka në qendër Garancinë Europiane për Fëmijët që organizohet në Tiranë. Garancia Europiane për Fëmijët është një nismë e BE-së, e cila dhe e vetme besoj do të mjaftonte t’i jepte një përgjigje kuptimplotë atyre që pyesin se për çfarë na duhet BE-ja. Mjafton të shohësh përmbajtjen e programit të kësaj garancie, për fëmijët që të kuptosh thellësinë e dobisë së të qenit së bashku në familjen europiane dhe thellësinë e të kuptuarit të sensit të solidaritetit në atë familje”, u shpreh Rama.
Gjatë fjalës së tij, ai tha se plotësimi i të gjitha kushteve për fëmijët, është prioritet për Bashkimin Evropian, i cili përmes programeve e financimeve synon garantimin e të gjitha shërbimeve në jetën e përditshme.
“Përmes garancisë europiane për fëmijët, BE synon që të drejtat e fëmijëve t’i sigurojë dhe t’i vendosë në fokusin e jetës së vet të përditshme, dhe nga ana tjetër përmes këtij programi të shumëfishojë të gjitha rrugët dhe të gjitha mundësitë që çdo fëmije t’i jepet një shans.
Nëse i referohemi shifrave është realisht një pasqyrë tejet kuptimplotë për domosdoshmërinë e thellimit të politikbërjes në funksion të fëmijëve dhe rritjen e ndërveprimit mes gjithë aktorëve shoqërore e institucionalë për akses të barabratë në arsim cilësor, për ofrim të shërbimit shëndetësor, kushte të përshtatshme strehimi, zhvillimin e programeve të mbrojtjes së dedikuar.
Për të siguruar përmirësimin e kushteve sociale për fëmijët me aftësi të veçanta dhe në tërësi për të rritur ndërgjegjësimin për të drejtat e fëmijëve. BE ka përcaktuar edhe një financim të veçantë që i ndihmon vendet anëtare për të ecur në shinat e paracaktuara përmes dokumentit të garancisë europiane dhe për të zbatuar masa konkrette në reduktimin e varfërisë së fëmijëve dhe nga ana tjetër në ngushtimin e hendekut që është krejt shqetësues në të gjithë hapësirën europiane, sidomos si rezultat i goditjes që i dha pandemia pëlhurës sociale”, shtoi Rama.
