Pas miratimit nga Këshili i Lartë i Prokurorisë të tre kandidatëve që synojnë të marrin drejtimin e SPAK, ka reaguar ambasadorja e SHBA-së në Tiranë, Yuri Kim.
Përmes një postimi në “Twitter”, ambasadorja Kim thotë se është e rëndëshme që procesi të jetë transparent dhe pa manipulime nga ata që kërkojnë të bllokojnë apo ndikojnë në drejtësi.
“Tani që janë konfirmuar kandidatët për kreun e ardhshëm të SPAK-ut, është thelbësore që procesi të jetë transparent në mënyrë që kreu i ardhshëm i Prokurorisë Speciale të zgjidhet në bazë të kualifikimeve dhe historikut dhe të jetë i aftë e i vendosur për të intensifikuar luftën kundër korrupsionit dhe krimit të organizuar.
Procesi i përzgjedhjes duhet të jetë pa manipulime nga ata që kërkojnë të bllokojnë apo ndikojnë në drejtësi, nga ata që preferojnë mënyrat e vjetra dhe për rrjedhojë kundërshtojnë reformën në drejtësi. Taktika të tilla i përkasin një të shkuare që ka dëmtuar shumë. SPAK-u, ashtu si reforma në drejtësi duhet t’i shërbejë të ardhmes së Shqipërisë”, shkruan Kim.
Kujtojmë se, kandidatë për kreun e SPAK janë Adnan Xholi, Altin Dumani dhe Edvin Kondili.
