Komisioni i Përzgjedhjes ka vendosur që të skualifikojë 22 kandidatë nga gara për kreun e BKH-së dhe të kalojë për në fazën tjetër 18 të tjerët.
Gara për kreun e Byrosë Kombëtare të Hetimit u mbyll më datë 31 janar dhe pas shqyrtimit të dokumenteve bazë të 40 aplikantëve, Komisioni Përzgjedhës në SPAK vendosi se vetëm 18 i plotësonin kushtet për të vazhduar garën.
Kandidatët e përzgjedhur janë: Adriatik Ago, Agim Ismaili, Aida Veizaj, Ardian Çipa, Artan Pjetërnikaj, Artan Shkëmbi, Artur Beu, Atnan Shehu, Blerina Bajollari, Eduart Merkaj, Endrit Hoxha, Ervin Hodaj, Gentian Hilla, Gentjan Shehaj, Idajet Faskaj, Lindita Nushi, Pëllumb Seferi, Ylli Pjetërnikaj
Këta kandidatë do ti nënshtrohen një hetimi gjë do të zgjasë rreth dy muaj.
Sipas ligjit “Për Organizimin dhe Funksionimin e Institucioneve për Luftuar Korrupsionin dhe Krimin e Organizuar ”, Kandidati për Drejtor i Byrosë Kombëtare të Hetimit mund të jetë personi që ka vetëm shtetësi shqiptare, që gëzon cilësi të larta profesionale dhe morale, dhe që plotëson këto kritere:
a) ka përfunduar ciklin e dytë të studimeve universitare për drejtësi me diplomë të barasvlershme me “Master i shkencave”, ose arsimin e lartë policor;
b) ka eksperiencë pune si prokuror, punonjës i Policisë së Shtetit apo Policisë Gjyqësore ose hetues i Byrosë Kombëtare të Hetimit;
c) ka përvojë pune të paktën 5 vjet në çështje që kanë të bëjnë me veprat penale në fushën e korrupsionit, krimit të organizuar apo krimeve të rënda;
ç) nëse ka qenë apo është punonjës i Policisë së Shtetit, të ketë mbajtur për jo më pak se 3 vjet gradën “Komisar”, “Kryekomisar”, “Drejtues” apo “Drejtues i Parë”;
si edhe të ketë dërguar deklaratat për dhënien e pëlqimit të tij dhe të anëtarëve të afërt të familjes për heqjen e dorë nga privatësia (dhënien e pëlqimit për kontroll periodik të llogarive bankare dhe telekomunikimeve vetjake). /Opinion.al
