Inspektorë të policisë, të Komisariatit nr.6 në Tiranë kanë kryer sot një kontroll në bizneset përgjatë autostradës Tiranë-Durrës, konkretisht në zonën e Kasharit. Policia u ka kërkuar bizneseve të vendosin kamerat e sigurisë në funksion të ligjit “Nr. 19/2016 PËR MASAT SHTESË TË SIGURISË PUBLIKE” i miratuar në shtator të 2016 me iniciativën e ish-ministrit Tahiri. Ligji në fjalë nuk është zbatuar deri më tani. pasi ishte paditur në Gjykatën Kushtetuese nga shoqatat e bizneseve. Porse në korrik, gjykata vendosi të rrëzojë kërkesat e bizneseve dhe të lërë në fuqi ligjin.
Tani lipset zbatimi i tij. Deri këtu inspektorët janë në rregull. Por për të informuar bizneset për këtë ligj ata u kanë lënë në dorë një shkresë të pakuptimtë. I revoltuar, njëri prej tyre denoncoi në Opinion.al.
Siç shihet edhe nga kjo faksimile, policët u kanë dorëzuar bizneseve një kopje të kërkesës që ka bërë kompania Coca-Cola për tu pajisur me kamera, duke ua paraqitur atyre si shembull.
Në fakt kjo është një gafë pasi policia duhet të njohë subjektet me ligjin dhe mundësisht t’ju lërë në dorë një kopje të ligjit dhe jo këtë dokument pa vlerë.
Gjithashtu, Drejtoria Vendore e Policisë së Tiranës duhet të sqarojë këtë situatë, pasi bizneset kanë të drejtë të informohen si duhet mbi afatet, mënyrën, etj. të pajisjes me kamera sigurie siç parashikon ligji. /Opinion.al
