Kur debati për maturantët që kanë mbetur jashtë universiteve vlon, Ministria e Arsimit ka hapur një tender që synon të ndryshojë sistemin elektronik të vlerësimit.
Sipas detajeve të bëra të ditura, ndryshimi duhet të bëhet brenda dy muajve dhe lidhen me mënyrën e aplikimit dhe regjistrimit të aplikantëve në programet e studimit të ofruara nga IAL private dhe publike për vitin akademik 2016 – 2017.
“Si objektiv kryesor është kryerja e ndryshimeve të nevojshme në sistemin aktual, në mënyrë që të realizohen në kohë aplikimet me formularët e rinj, ku përfshihen IAL-të publike dhe private.
“Universitetet private deri tani nuk janë përfshirë në aplikimin me anë të portalit aktual”, thuhet në dokumentat e tenderit.
Por cilat aspekte të sistemit do ndryshojnë:
a) Hedhja e mjediseve, pikëve të provimit D3, si dhe gjenerimi i listave emërore dhe të sekretimit;
b) Modifikimi i formularit A1/A1Z;
c) Gjenerimin e raporteve të pikëve dhe raportit të pikëve sipas lëndëve;
d) Modifikimi i formularit A2 dhe A3, që tashmë nuk kanë lidhje me llogaritjen e pikëve, por janë dy formularë të ri aplikimi;
e) Procesi i regjistrimit të studentëve që shkëputen nga modulet aktuale, meqenëse fituesit nuk shpallen më nga sistemi;
f) Shtimi i një formulari të ri, për aplikimin e shtetasve të huaj dhe kuotat e tjera.
Sistemi i ri mundëson që secili nga Insiucionet e Arsimit të Lartë apo fakultet të kryejë rankimin sipas kritereve të tyre të maturantëve aplikantë, si dhe rreshtimin e fituesve sipër vijës së kuqe në varësi të kuotave të ofruara për atë program studimi.
Regjistrimi i aplikantëve shkëputet nga listat e fituesve që shpallen sipas modelit të vjetër Meritë/Preferencë. Regjistrimin e fituesve e bëjnë sekretaritë mësimore.
“Një aplikant mund të regjistrohet nga ana e sekretarive arsimore vetëm në njërin nga programet e studimit ku ka aplikuar edhe nëse është fitues në më shumë se një program studimi. Në rast të kundërt i jepet njoftim nga sistemi që është i regjistruar në një program dhe nëse dëshiron mund të çregjistrohet nga i mëparshmi për t’u regjistruar në një program tjetër ku është shpallur fitues. E gjithë kjo procedurë regjistrim – çregjistrimesh do të zgjasë 7 ditë (zëvendëson regjistrimin online të viteve të mëparshme me të vetmin ndryshim që nuk bëhet nga kudo prej maturantëve por vetëm në sekretaritë mësimore të IAL”, thuhet në dokumentet e ministrisë.
Tender i ministrisë është hapur vetëm një ditë më parë dhe parashikon që ndryshimet të kryhen në një kohë sa më të shpejtë me një fond limit prej 4.1 milionë lekësh.
