Në Këshillin e Mandateve, pak minuta më parë, ish-ministri i Brendshëm Saimir Tahiri, i është drejtuar deputetit demokrat, Enkelejd Alibeaj, si z.Habilaj, ku dhe ka provokuar të qeshura në sallë.
Menjëherë, Tahiri kërkoi ndjesë, duke pranuar se ishte një lapsus.
Gazetarët këtë lapsus të ish-ministrit e trajtuan me doza humori në rrjetet sociale, ku shkruanin se subkoshienca, ka raste që flet me gjuhën e vesit.
Këshilli i Mandateve dhe Rregulloreve është mbledhur këtë paradite për kërkesën e Prokurorisë së Krimeve të Rënda për heqjen e imunitetit të Saimir Tahirit dhe dhënien e autorizimit për arrestimin e tij.
Vetë ish-ministri i Brendshëm ishte i pranishëm në këtë mbledhje, por do të jetë avokati i tij Artan Hadaraj që do të flasë për të. Ndërsa organi i akuzës është përfaqësuar nga kreu i Prokurorisë së Krimeve të Rënda, Besnik Hajdarmataj.
