Kryeministri Rama ua ka ngrirë buzëqeshjen në buzë nxënësve të shkëlqyer, të cilëve vetëm dy ditë më parë, mesaduket nga ngazëllimi, u kishte premtuar 50 mijë lekë të reja shpërblim për arritjet e shkëlqyera që ata kanë në mësime.
Deklaratë e cila bëri me zemër edhe ministrin e Financave Shkëlqim Cani. Në fakt mesa duket gjithçka ka qenë një gafë e Kryeministrit, i cili u përpoq të ndreqej sot, duke e cilësuar lapsus shifrën e shpërblimit të dhënë dy ditë më parë.
“Nuk është vetëm 50 mijë lekeshi që merrni, i vjetër, kam bërë lapsus ditën e parë e gati sa nuk përfundoi në urgjencë Ministri i Financave kur e dëgjoi. Më shumë se shuma që mund të blini libra apo të bëni qejf është nevoja për t’u thënë faleminderit, për t’u thënë faleminderit se jeni burim inspirimi, jeni burim forcë në moment të vështira, shembull kuptimplotë, kur duket se ata që ankohen kanë të drejtë, dhe ka momente të tilla” tha Rama.
