Një gafë mund të quhet ajo e efektivit të Gardës, Geraldo Guci. Pasi kishte arritur të vidhte karburantet me një pistoletë lodër kishte dështuar të mbulonte gjurmët. Në dosjen hetimore thuhet se ai u kap përmes lokalizimit të vendndodhjes së telefonit.
Më 16 tetor 2016, ai ka grabitur me armë një pikë karburanti në Selitë ku ka arritur të marrë 8 mijë lekë të reja dhe një telefon “Iphone 6”. Duke gjurmuar adresën “Icloud”, policia ka arritur të lokalizojë vendndodhjen e telefonit. Gjurmët çonin askund më pak se brenda sallës së seancave plenare të Kuvendit të Shqipërisë, raporton Gazeta Shqiptare.
Geraldo Guci është arrestuar dhe në deklarimin e tij ka shpjeguar se është ai autori i vjedhjes së karburant Gulf në Selitë. Ai shpjegon se ka vjedhur dy herë karburant Gulf ne Selite e ndodhur me datat 12.10.2016 dhe më datë 16.10.2016, si dhe ka vjedhur edhe karbuarnt Kastratin në Unazën e Re e ndodhur më datë 09.10.2016.
“Vendosa të vidhja pikat e karburanteve, sepse kisha borxhe. Shokët më kërkonin paratë dhe unë kisha turp t’i thosha babait. Nën kërcënimin e një arme lodër, shitësit të njërit prej karburanteve i mora 400 mijë lekë të vjetra. Me një pjesë të tyre lava borxhet, ndërsa me pjesën tjetër të parave luajta në skedina…”
Geraldo Guci, ish-ushtar profesionist në Gardën e Republikës, i cili ka pranuar se ka kryer 4 grabitje në Tiranë ka shprehur pendesë të thellë për veprimet e kryera. Aktualisht Guci po gjykohet nga drejtësia për krimet e kryera.
