Sot u mbajt Asambleja e Zakonshme e Federatës Shqiptare të Futbollit. Në prani të gjithë anëtarëve të saj, qeveria jonë e futbollit kreu “ritet” e zakonshme në kësi rastesh, riformuloi me emra të rinj Komisionin e Etikës, ndërkohë që shpërndau edhe disa çmime për ish-futbollistë të ndryshëm, me titullin “Legjenda e Futbollit Shqiptar”. Një të tillë e ka marrë edhe Ylli Shehu, ish-sulmuesi i Partizanit dhe kombëtares kuqezi, tashmë në rolin e specialistit dhe trajnerit të futbollit.
Motivacioni që lexohet në pllakatën e tij vlerësuese është: “Për kontributin e dhënë si sulmues virtuoz me skuadrën e Tiranës dhe kombëtaren e Shqipërisë. Një nga emrat më të njohur të futbollit shqiptar në vitet 1980. Vazhdon të japë kontributin e tij edhe në trajningun shqiptar”. Pra, sikurse shihet, FSHF-ja e ka bërë ish-sulmues të Tiranës një nga ikonat e Partizanit. Nuk dihet si është ndier vetë Ylli Shehu kur e ka parë këtë “lapsus”, nuk po themi gafë, në pllakatën e mirënjoihjes dhe vlerësimit që ka marrë nga FSHF-ja. Natyrisht, i është dukur si një bakllava, sipër së cilës ishte hedhur edhe pak kripë.
E njëjta gafë mësohet se është bërë edhe në pllakatën e Andrea Markos, i cili, po ashtu, rezulton si “sulmues i Tiranës”. Tashmë duhet gjetur ku ka çaluar problemi: FSHF-ja do të kishte dashur që këta dy ish-futbollistë të njohur të kishin luajtur me Tiranën, ndaj e kanë dërguar për stampin në këtë mënyrë tekstin, çka është provokuese për rivalitetin mes tri skuadrave kryeqytetase, sidomos në ato vite, 1980, apo studioja përkatëse, që i ka punuar, është tifoze me Tiranën dhe ka “sabotuar”.
