Në Ditën Botërore të Refugjatëve, këto janë fytyrat e Sirianëve të cilët nuk mund të kthehen në shtëpitë e tyre.
Të rrahur, të djegur dhe të bombarduar. Këto janë vetëm disa nga fytyrat e Sirianëve që kanë ikur nga lufta e tmerrshme civile që ka kapluar vendin e tyre gjatë 5 viteve të fundit.
Por këta refugjatë nuk janë në rrugën drejt Evropës – në fakt ata mezi ia dolën të kalonin kufirin turk.
Rime Abd Al Rahman, 12 vjeçe, dhe vëllai i saj Ismaili, 10 vjeç, shpëtuan kur shtëpia e tyre u shkatërrua nga një bombë, por kanë mbetur të djegur, transmeton Gazeta Express.
Ata ikën në Gaziantep në Turqi nga Alepo më 2014 për një trajtim mjekësor – duke mësuar më pas se kishin humbur prindërit e tyre dhe kishin mbetur vetëm.
Dhe gjyshërit e tyre kanë mbetur të ngujuar në Siri, në mes të ISIS-it, forcave të regjimit të Asadit dhe forcave kurde.
Shumica e fëmijëve të tillë në Siri janë bombarduar, qëlluar dhe traumatizuar. Disa prej tyre ëndërrojnë të ecin përsëri, dhe disa dëshirojnë të kthehen në shtëpi.
Në Ditën Ndërkombëtare të Refugjatëve, këta fëmijë janë duke u trajtuar nga Organizatat Ndërkombëtare Mjekësore, të cilat po u ndihmojnë të rehabilitohen në Turqi.
