Ish-kryeministri italian, Silvio Berlusconi do të varroset me nderime shtetërore, ndërsa varrimi do të bëhet në Katedralen e Milanos të mërkurën nga ora 14:00.
Presidenti i Republikës së Italisë, Sergio Mattarella, në deklaratën e tij për vdekjen e Berlusconit, tha se “ai ishte një lider i madh politik, që vulosi historinë e Republikës Italiane”.
“Si lider ai kontribuoi në krijimin e një realiteti të ri në politikën italiane dhe ka qenë kryeministër katër herë”, shtoi Mattarella. Në fund, presidenti italian iu referua sukseseve dhe veprimeve inovative të Silvio Berlusconit si biznesmen.
Deri në momentin e funeralit, trupi i Silvio Berlusconit do të qëndrojë në Villa San Martino në Arcore. Për arsye të rendit publik, hyrja do të rezervohet ekskluzivisht për anëtarët e ngushtë të familjes.
Ndërkohë që nënsekretari i Presidencës së Këshillit, Alfredo Mantovano ka njoftuar se dita e mërkurë është shpallur ditë zie kombëtare, pikërisht ditën e funeralit shtetëror të Silvio Berlusconit.
Flamujt u ngritën në gjysmështizë në hyrje të Palazzo Chigi, në shenjë zie pas vdekjes së Berlusconit. Trengjyrëshi italian dhe flamuri i Bashkimit Evropian, sipas raportimeve, do të ngrihen deri në gjysëmshtizë deri të mërkurën, kur do të bëhet edhe varrimi shtetëror.
Do të jetë kryepeshkopi i Milanos, Imzot Mario Delpini, ai i cili do të kremtojë varrimin e ish-kryeministrit, i cili do të bëhet të mërkurën në Katedralen e Milanos./Opinion.al
