Kryeministria i është drejtuar me një tjetër letër Partisë Demokratike, ku shprehet gatishmëria e Edi Ramës për t’u takuar me Lulzim Bashën që ditën e shtunë. Por në përgjigjen e selisë blu shpjegohet se për shkak të axhende jashtë vendit të Bashës, ky i fundit është i gatshëm të takohet më 1 qershor.
Pasi Edi Rama dhe Lulzim Basha rikonfirmuan publikisht gatishmërinë për t’u takuar me njëri-tjetrin, Kryeministria i është drejtuar selisë blu me një shkresë zyrtare. Letra e firmosur nga Vali Bizhga, drejtore e kabinetit pranë Kryeministrit, me nr. Protokolli 3433, i drejtohet homologes së saj në Partinë Demokratike, Greta Deljani.
“Kryeministri është i gatshëm të takohet me Kryetarin e Partisë Demokratike që nesër në orën 11:00. Zoti Basha është sigurisht i mirëpritur të caktojë orën e takimit në çdo rast.
Duke qenë se vendi i takimit është lënë në zgjedhjen e Kryeministrit, ai mund të zhvillohet në Sallën e Hartave, në godinën e Këshillit të Ministrave.
Në letrën e Kryeministrisë, bie në sy fakti se Rama është i gatshëm të bisedojë me Bashën jo vetëm për Reformën në Drejtësi, por edhe për atë Zgjedhore, kjo e dyta e cilësuar nga Partia Demokratike si “prioritet mbi prioritetet”.
“Kryeministri do të jetë i shoqëruar nga Kryetari i Komisionit parlamentar për Reformën në Drejtësi, Z. Fatmir Xhafaj, si edhe nga Kryetari i Komisionit parlamentar për Reformën Zgjedhore, Z. Bashkim Fino. Zoti Basha është mëse i mirëpritur të vijë i shoqëruar sipas dëshirës së tij”. Në kuadër të këtij takimi, Kryeministri do të dëshironte të trajtonte sëbashku me Kryetarin e Partisë Demokratike, çështjen e Reformës në Drejtësi, atë të Reformës Zgjedhore dhe çdo çështje tjetër me rëndësi dhe interes të përbashkët”.
Përgjigjja nga zyra e kryedemokratit ka mbërritur brenda pak orësh, ndërsa në respekt të protokollit, shkëmbimi është kryer gjithashtu në nivel drejtorësh kabineti. Në pak më shumë se 3 rreshta, Greta Deljani i shpjegon Vali Bizhgës se axhenda e Bashës e bën të pamundur takimin ditën e shtunë.
“Për shkak të një agjende ndërkombëtare të konfirmuar më parë, Kryetari Basha është i mundur të realizojë takimin duke nisur prej ditës së mërkurë, datë 1 qershor 2016. Për ditën, vendin dhe formatin e takimit, jam e gatshme të vendosim kontakt menjëherë me ju për të nisur rakordimet e nevojshme”.
Ndonëse nuk përmendet në letër, përgjigjja e Partisë Demokratike le të mendohet se ka pak gjasa që takimi Rama-Basha të zhvillohet në ambientet e Kryeministrisë, siç është propozuar nga kreu i Qeverisë.
