FSHF reagon për Skënderbeun: Lajm i keq për futbollin shqiptar

Federata e Futbollit në Shqipëri ka reaguar për çështjen e fundit të Skënderbeut, pas vendimit të marrë nga Komisioni i Disiplinës dhe Etikës në UEFA, me 10 vite pezullim si dhe 1 milionë euro gjobë ndaj klubit korçarë.
Nëpërmjet një reagimi në uebin zyrtar, FSHF shprehet se ky është një lajm i keq për futbollin shqiptar. Megjithatë, në këtë reagim, Federata thekson faktin se ky është një vendim i apelueshëm dhe do të kalojë në shkallë të tjera të gjykimit, duke lënë të kuptohet kështu idenë se nuk e dëshiron një dënim të këtij klubi.
Reagimi i plotë
Federata Shqiptare e Futbollit bën me dije opinionin publik se UEFA ka vënë në dijeni sot FSHF për vendimin e marrë nga ana e Komisionit të Disiplinës dhe Etikës pranë saj, për çështjen “Skënderbeu”.
Sipas vendimit të marrë, ky Komision ka dënuar skuadrën e KF Skënderbeu me 10 vjet mospjesëmarrje në kompeticionet europiane të futbollit, shoqëruar me një sanksionin financiar prej 1 mln euro.
Ky vendim është i apelueshëm. FSHF e konsideron këtë një lajm të keq për futbollin shqiptar, megjithëse ky nuk është një vendim përfundimtar, pasi do të kalojë edhe në shkallë të tjera të gjykimit.
FSHF mbështet çdo vendim që i shërben integritetit të lojës dhe Fair-Play-t!