Administrimi i stadiumit “Loro Boriçi” është rikthyer edhe një herë në vëmendje pas kërkesës së drejtuar Bashkisë Shkodër nga Federata Shqiptare e Futbollit. Në kërkesën e firmosur nga presidenti Armando Duko, FSHF ka një projekt-propozim të ri, në të cilin kërkon administrimin e plotq të stadiumit, si dhe të gjitha mjediseve të tij.
“FSHF është e gatshme të marrë përsipër menaxhimin e stadiumit ‘Loro Boriçi’”, thuhet në propozimin e Federatës, duke nënkuptuar të gjitha shpenzimet.
Në nenin 5 të kësaj projektkontrate janë të përcaktuara se si do të ndahen të ardhurat. Për ndeshjet e Vllaznisë FSHF-ja kërkon 60% të të ardhurave, duke përllogaritur edhe ndeshjet ndërkombëtare.
Kjo është paradoksale duke qenë se Bashkia Shkodër është pronare e stadiumit, si dhe është më se normale që të ketë më shumë të ardhura nga ndeshjet ndërkombëtare ku përfitimet janë disa herë më të shumta sesa ndeshjet e kampionatit shqiptar.
Për sa u përket takimeve të ekipeve kombëtare në këtë impiant, FSHF-ja kërkon që të ketë 100% të të ardhurave.
