Pas Shteteve të Bashkuara të Amerikës edhe Britania e Madhe ka nisur betejën virtuale kundër Shtetit Islamik. Forcat speciale britanike kryen me sukses operacionin e parë kibernetik kundër ISIS. “Daily Mail”, i cili i referohet burimeve nga Ministria e Mbrojtjes, shkruan se sulmi bllokoi për 40 minuta rrjetin e xhihadistëve në qytetin Sirte, në Libi, ku u ndërprenë të gjitha komunikimet përmes internetit dhe telefonave inteligjentë.
Operacioni u krye nga një avion spiun i forcave ajrore mbretërore dhe u drejtua nga një komandë në Detin Mesdhe. Sipas mediave të vendit ishullor, ky operacion do të pasohet me dërgimin në Libi të rreth 50 forcave speciale të marinës britanike.
Kjo nuk është hera e parë që aleanca kundër terrorizmit ndërmerr sulme kibernetike kundër Shtetit Islamik.
Në muajin Mars Shtetet e Bashkuara të Amerikës nisën një fushatë online kundër xhihadistëve në Siri dhe Irak. Lufta kibernetike është një front tejet i rëndësishëm në mposhtjen e terrorizmit, duke pasur parasysh radikalizimin dhe rekrutimin e militantëve përmes internetit. /Tvklan
