Fredi Beleri është zyrtarisht kandidat për eurodeputet i partisë së djathtë greke “Demokracia e Re”.
Lajmi është konfirmuar nga kryeministri i Greqisë, Kyriakos Mitsotakis gjatë aktivitetit për prezantimin e fletëvotimit të Demokracisë së Re për zgjedhjet e 9 Qershorit.
I pranishëm në këtë aktivitet ishte edhe vëllai i kryebashkiakut të zgjedhur të Bashkisë Himarë, Leonardo Beleri.
“Kathimerini” raporton se një total prej 42 personash përbëjnë fletën e votimit, mes të cilëve shqiptarët Fredi Beleri dhe Pirro Dhima.
Kjo lëvizje e Mitsotakisit vjen në një kohë kur çështja “Beleri” u kthye në përplasje mes dy vendeve.
Fredi Beleri u dënua me dy vite burg për veprën penale të shitblerjes së votave, së bashku me bashkëpunëtorin e tij Pandeli Kokaveshi nga Gjykata e Shkallës së Parë e GJKKO-së.
Për shkak të dënimit, ai nuk mundi dot të bëjë betimin për të ushtruar detyrën si kryebashkiak i zgjedhur i Himarës.
