Berat Gjimshiti, Herolind Shala, Milot Rashica dhe Amir Rrahmani e kanë mësuar duke parë këtë listë, se nuk do të shkonin në fazën finale të “Euro 2016”. Asnjë kontakt tjetër nga De Biazi, i cili, ashtu si për gazetarët në konferencën për shtyp, ditën kur publikoi listën e 27 futbollistëve të përgatitores së Austrisë, kur tha se nuk jep llogari për zgjedhjet e tij, nuk ka denjuar t’ua thotë veç e veç kuqezinjve në fjalë, qoftë edhe duke i ngushëlluar me ndonjë justifikim.
Letra (lista) e De Biazit për lojtarët, ata që mbijetuan për në “Euro 2016” dhe katër të tjerët, që u “skarcuan” Ai ka vijuar të qëndrojë “thundrafortë”, në terrenin e vet të mosdhënies së arsyeve të mosarsyes, edhe pse publiku pret më tepër sqarime mbi atë që ndodh në kombëtaren shqiptare, sepse ajo është e krejt kombit, madje, jo vetëm e shtetit që përfaqëson. Mësohet se presidenti Armand Duka ka folur e biseduar me katër lojtarët, ndërsa Bushi dhe Bogdani janë munduar t’i ngushëllojnë, edhe pse mërzia ka qenë e madhe, nata e mbrëmshme ka qenë më e gjata për të katër.
Mungesa e De Biazit sot në mëngjes, për t’i përcjellë nga hoteli lojtarët në fjalë, tregon se vetë ai nuk ka pasur kurajo të përballej sy më sy me ta, ndërkohë që “thumbimin” e parë e ka marrë nga Berat Gjimshtiti, me statusin që ka lënë në Facebook mbrojtësi i Atalantës në Seria A: “Ndonjëherë jeta nuk ta jep atë që don, jo sepse nuk e ke meritu, por sepse meriton më shumë! Të gjithë çunave iu uroj suksese në Francë!”
