Nga Nathalie Goulet/ The Guardian
Në Francë ne jemi të trishtuar dhe të zemëruar. Shpirti “Charlie Hedo” ka marrë fund përgjithmonë dhe bashkë me të, çdo lloj solidariteti kombëtar.
Politikisht ne përballemi me zgjedhjet presidenciale vitin e ardhshëm, një garë rezultati i së cilës do të përcaktohet nga ajo se cili kandidat mund të demostrojë vendosmërinë për të sjellë fuqi të reja sigurie në vend.
Ne ishim nën masa sigurie kur sulmi i Nisës ndodhi. Në fakt, presidenti François Hollande mbajti fjalimin tradicional atë ditë feste, duke deklaruar se ai do të hiqte masat e imponuara pas mizorive të Parisit, Nëntorin e kaluar.
Por sulmuesi i Nisës nuk ishte në listën e mbikqyrjes dhe sulmi me kamion nuk mund të parashikohej. Vrasësi nuk ishte i njohur si individ i radikalizuar. Shërbimet inteligjente nuk kishin gjurmë të tij sepse ai kishte jetuar një jetë të zakonshme. Kjo është pjesa më e frikshme e ngjarjes: Si mund të parandalojmë sulme të tilla që vijnë nga çdo lagjie e zakonshme?
Unë kam frikë se përgjigja është: Ne nuk mundemi!
Nice është një qytet shumë i sigurt me shumë kamera CCTV në rrugë dhe një prani të fortë të policisë lokale, përveç policisë kombëtare. Kryetari i Nicës është shumë i përfshirë në këtë situatë.
Zgjedhjet presidenciale dhe parlamentare janë planifikuar për vitin 2017, dhe pas kësaj ngjarje, siguria do të dominojë të gjitha manifestet e zgjedhjeve.
Pas Nicës ne ndjehemi të rrethuar nga dhuna. Shoqëria franceze, si shumë të tjerë, është e sëmurë. Ne tani kemi më shumë se 10.000 të rinj francezë nën mbikëqyrje të cilët besohet të jenë në prag të radikalizmit, duke përfshirë edhe 40% të cilët janë kthyer në fenë islame.
Por ne kemi nevojë për një kontroll të realitetit: Asnjë pirg ligjesh kundër terrorizmit nuk do të largojë rininë nga skajet e ekstremizmit, në shoqërinë Franceze.
Këta njerëz në fakt kanë humbur çdo lidhje me shtetësinë e tyre. Për ata fëmijë të humbur të Francës, ne duhet të rikthejmë besimin në Republikën Franceze. Dhe kjo do të thotë më shumë arsimim dhe më pak diskriminimin.
Ne nuk kemi nevojë për ndonjë pezullim të mëtejshëm të lirive civile; ne kemi nevojë për të zbatuar ligjin ekzistues me zero tolerancë për ndonjë krim të kryer në Francë, qoftë nga një shtetas , qoftë nga një jo-shtetas. Por ne gjithashtu duhet të shmangim islamofobinë.
Si mund ta luftosh terrorizmin kur jeton në demokraci? Është e mundur, dhe duhet bërë pa humbur shpirtin tonë.
Përktheu: Alteo Hysi
