Ben Blushi ka nisur nga Berati turin që e ka quajtur “Shqipërinë mbi partinë”.
Ai ka qenë në takimin e së shtunës pasdite me deputetët Mimoza Hafizi, Maqo Lakrori, Marko Bello si dhe Petrit Ago. Kujtojmë se Blushi ishte edhe në Shkodër para një jave, por tashmë duket se lëvizja e tij po merr formë dhe po i bashkohen akoma më shumë socialistë.
“Ajo që na mbledh sot, për fat të keq është dëshpërimi. Shqipëria është një vend i dëshpëruar. Në 25 vjet demokraci nuk morëm atë që prisnim”, tha Blushi.
Po ashtu, deputeti tha se Shqipëria sot është një vend i papunë dhe i më i korruptuar. “Shqipëria sot është vendi me emigracionin më të lartë dhe po përballë një emergjence të madhe. Shqipëria mund të bëhet duke i dhënë fund këtij 25vjeçari tragjik. Gjendja është e rëndë pasi kanë munguar reformat”, tha Blushi.
Duke folur për zgjedhjet në parti, ai tha se “ne jemi anëtarë të një partie që nuk bën zgjedhje’. “Do bindim qytetarët se ky vend mund të bëhet. Asnjë vend nuk mund të bëhet kur nuk ka demokraci. Brenda 25 viteve në PS po grabiten votat e vetë socialistëve”, tha ai.
Fjalën në takim e mori dhe deputetja Hafizi, e cila deklaroi se brenda Partisë Socialiste gjërat nuk po funksionojnë ashtu siç duhet dhe drejt. Ka ardhur koha te ngremë zërin. Në PS gjërat nuk po funksionojnë drejt”, tha Hafizi.
Ata po shpalosin idetë e tyre për një qeverisje më të mirë dhe një PS me standarde që respektohet. Deputetët u nxitën për këtë tur, pas referendumit të 9 prillit, të cilin ata e cilësojnë të manipuluar. Ndaj në këto takime që do të shpërndahen edhe në qytete të tjera të vendit ata do të sqarojnë anëtarësinë se si është abuzuar me emrat e tyre.
