Një 35-vjeçar shqiptar, baba i dy fëmijëve, është masakruar me thikë mëngjesin e ditës së sotme nga fqinja e tij greke.
Mediat kanë raportuar se ngjarja e rëndë ka ndodhur rreth orës 01:00 të mëngjesit, ndërsa autore e krimit është një vajzë 26-vjeçe.
Nga të njëjtat burime, mësohet se shqiptari 35-vjeçar, kishte dalë rreth orës 01:00 të mëngjesit nga shtëpia e tij dhe kishte shkuar tek fqinja greke, e cila kishte ngritur muzikën dhe po shkaktonte rrëmujë.
“Ajo ishte në krizë totale, pasi ishte përdoruese droge”, -shkruajnë mediat greke.
Sipas tyre, në momentin kur 26-vjeçarja e ka vënë re shqiptarin që po i afrohej banesës së saj, ajo ka marrë një thikë në kuzhinë dhe e ka sulmuar menjëherë. Mediat tregojnë se grekja e ka qëlluar disa herë me thikë në kraharor.
Menjëherë është njoftuar ambulanca dhe policia, por edhe pse ndërhyrja ishte e shpejtë, babai i dy fëmijëve, një djali 7 vjeç dhe i një vajze 15 muajshe ka ndërruar jetë duke u transportuar për në spital.
