Me qindra qytetarë ankohen çdo ditë se kanë mbetur me orë të tëra në trafik në kryeqytetin shqiptar. Nuk është një orë, apo dy…dhe nuk është një ditë e vetme. Eshtë një situatë e vështirë dhe e vazhdueshme, për të cilën nuk reagon askush.
Policia është ‘dorëzuar’, duke deklaruar para dy javësh se nuk mund të menaxhohet më trafiku në Tiranë. Nga ana tjetër kryetari i bashkisë, Veliaj, që administron territorin publik përfshi dhe rrugët, thotë se duhet lëvizur me biçikleta, pasi sipas tij, Tirana është bërë për 170 mijë njerëz jo për 170 mijë makina.
Në fakt më shumë se sa shtimi i makinave, duket se situata është krijuar për shkak të punimeve që hapen në prag të zgjedhjeve pas asnjë lloj plani paraprak për menaxhimin e trafikut. Bllokimi i Sheshit Skenderbej, punimet prej më shumë se 1 viti tek mbikalimi i Rrugës Kavajës me Unazën e Re, rikonstruksionet e tjera në rrugë dytësore, kanë bërë që lëvizja në Tiranë të bëhet e papërballueshme.
Fotot që shoqërojnë këtë lajm janë bërë mesditën e sotme në rrugën e Porcelanit. Prej ditësh edhe kjo rrugë paraqitet me trafik të rënduar. Të shumtë janë qytetarët që postojnë në rrjetet sociale apo i përcjellin nëpër portale fotot dhe videot e rrugëve të bllokuara në çdo cep të Tiranës, duke shpresuar në sensibilimin e institucioneve përgjegjëse./Opinion.al
