“Dasma mbretërore në Tiranë, rasti për të promovuar vendin e Shqiponjave”
Me këtë frazë, revista prestigjoze franceze “Point de Vue”, i referohet dasmës së Princit Leka Zogu II me Elia Zaharia, jehona e së cilës tashmë i ka kaluar kufijtë kombëtarë.
“Leka dhe Elia të Shqipërisë… martesa e tyre e dashurisë, përpara elitës”, me këtë titull revista shoqëron në kopertinë foton martesore të çiftit.
E shumë diskutuar në median vendase, tashmë dasma ka marrë vëmendjen e mediave ndërkombëtare si revista “Point de Vue”, e cila në dhjetra faqe dedikuar këtij eventi, është ndalur në çdo detaj.
Që nga bizhuteritë që zbukuruan priceshën e re Elia Zogu, fustani që ajo mbante veshur, e deri te detajet ceremoniale.
Në faqet e revistës duken me dhjetra foto të të ftuarve të rëndësishëm në dasmën mbretërore, siç ishin përfaqësuesit e familjeve mbretërore në Europë, duke e cilësuar eventin si ngjarjen më të rëndësishme që promovon vlerat kulturore dhe traditën e Shqipërisë.
