Luca Gaspari është një qytetar i thjeshtë italian. Ai jeton në qytetin Sarnico në Itali, 70 km nga Milano. Dy ditë më parë ndërsa po shoqëronte mamanë në një nga spitalet milanezë, ai u ndesh me një skenë që e impresionoi pa masë dhe të cilën mendoi ta hidhte nëpërmjet një statusi në facebook.
Ai takoi aty në shkallët e spitalit ish-kryeministrin e Italisë Mario Monti, i cili i zhveshur nga çdo lloj pompoziteti, u soll ashtu siç sillet një njeri i zakonshëm në përditshmërinë e tij, duke treguar modelin e një politikani që të gjithë do të dëshironin. Kush do të lexojë statusin e Luca Gasparit, do të fillojë të pyesë veten: A kemi ne në Shqipëri politikanë që sillen si prof. Mario Monti?
Ja statusi i Luca Gasparit
“Dje më ndodhi diçka e pazakontë
Isha në një spital milanez me mamanë time dhe në një moment erdhi prof. Mario Monti së bashku me bashkëshorten.
Zonja Monti duhej ti nënshtrohej të njëjtës ndërhyrje për të cilën ishte në pritje edhe mamaja ime.
Gjëja e papritur ishte se Profesor Monti erdhi pa eskortë, mbajti radhë si të gjithë dhe gruaja e tij priti radhën si çdokush.
Ndejti i ulur në shkallë për të gjithë kohën, asnjë sallon privat apo diçka tjetër.
Foli me gjithëkënd që e pyeste për diçka, pa u bezdisur dhe punoi ndërkohë gjithë kohën.
Këtë dedikim dua tua kushtoj të gjithë atyre vulgarëve që na përfaqësojnë që në vazhdimësi shfrytëzojnë pozicionin e tyre për interesin e tyre personal gjithmonë.
Sensi i gjithçkaje është që kur je i Madh nuk ke nevojë ta shprehësh këtë gjë!
Personalisht mbetem vetëm me një dyshim…nuk e di si e preferonte ujin, të gazuar apo natyral! Komplimente.”/ Opinion.al Dritan Laci
