Tradita e shumë viteve më parë është rikthyer sërish në Shkodër. Bëhet fjalë për atë të lajmërimit në vende të ndryshme në qytet për ndeshjet sportive që do të zhvillohen aty. Këtë traditë e ka rikthyer aktualisht klubi Vllaznia, pikërisht për ndeshjet e volejbollit dhe të basketbollit. Në një nga vendet më të frekuentura të shkodranëve, pikërisht në pedonale, janë vendosur dy tabela të mëdha ku lajmërohet data dhe ora e zhvillimit të të gjitha ndeshjeve të volejbollit dhe basketbollit. Njoftimet janë për të gjitha kategoritë, si për të rriturit, ashtu edhe për të rinjtë. Nëse deri dje pak njerëz kanë ditur nëse ka ndeshje apo jo në pallatin e sportit “Qazim Dervishi”, tashmë e kanë të lehtë ta mësojnë. Që nga mesi i javës dhe deri në fund të saj, periudhë kur zhvillohen zakonisht ndeshjet, çdokush që është i interesuar për këto takime, ka mundësi t’i mësojë aty se kur do të luhen. Një traditë e rikthyer me anë të së cilës pritet të shtojë numrin e tifozëve në “Qazim Dervishi”.
