Ndodh që një ndeshje të ketë shumë vlerë dhe futbollistët japin gjithçka për ta fituar. Mirëpo, ka edhe raste kur kupa është aq e madhe, saqë kapitenit i duhet ndihmë për ta ngritur. Lacio ka fituar përballë Malagës një ndeshje miqësore, për të cilën është vendosur edhe një kupë si shpërblim e quajtur “Costa del Sol”.
Një gol i Imobiles ka vënë në vështirësi kapitenin Luliç. Kapiteni i skuadrës ka kërkuar ndihmën e drejtorit sportiv Igli Tare për të ngritur në fund kupën gjigante.
Jo për nga vlerat siç është trofeu veshëgjatë i Ligës së Kampionëve, por një kupë e madhe për nga përmasat. Gjatë ceremonisë festive, Luliç e Tare nuk i kanë kursyer as batutat mes tyre që kanë bërë njëri-tjetrin të buzëqeshin dhe ta kalojnë me humor e sportivitet atë moment.
