Sektori i Emergjencave Civile pranë Prefekturës Elbasan nga informacionet e grumbulluara deri në orën 14:30 nga zyrat e emergjencave civile në shtatë bashkitë e Qarkut Elbasan raporton se në fshatin Marinaj në Njësinë Administrative Qendër të bashkisë Librazhd është dëmtuar banesa e familjes së Shpëtim Karait.
Në qytetin e Cërrikut ka dëmtime të pallatit numër 13, ndërsa në fshatin Shinjon në Njësinë Administrative Bradashesh është dëmtuar nga lëkundjet e tërmetit të orës 11:01 të ditës së sotme banesa e shtetasit Thoma Ranxha.
Nga informacionet paraprake të gjitha objektet e dëmtuara për shkak të lëkundjeve sizmike rezultojnë tejet të amortizuara.
Ndërkaq më herët u raportua se nga tërmeti pati plasaritje edhe të fasadës së pallatit numër 8 në lagjen “Dyli Haxhire Myzyri” në qytetin e Elbasanit. Fatmirësisht përveç panikut të madh dëmeve të vogla materiale nuk ka pasur dëme në njerëz.
