Sportistët nga Koreja e Veriut, një shtet që jeton nën diktaturën komuniste, monitorohen rreptë nga zyrtare të sigurimit të shtetit gjatë kohës që ndodhen në Lojërat Olimpike “Rio 2016”. Histori kjo që i ngjan Shqipërisë së diktaturës, por ja që në Korenë e Veriut kjo gjë ndodh ende. Por dje, turma që ndodhej në stadiumin “Maracana” u surprizua kur pa në monitorin e madh presidentin e këtij vendi, diktatorin Kim Jong-un, që bën një gjest aspak të hijshëm. Ai ka nxjerrë gishtin e mesit para kamerave, duke krijuar mjaft vërshëllima mes turmës.
Por natyrisht që në stadium nuk ka qenë diktatori koreano-verior, por një sozi i tij, që ka veshur një kostum të ngjashëm me atë të Kim Jong-un. Sozia kishte prerë edhe flokët njësoj si diktatori dhe mbante në dorë një flamur të vogël të Koresë së Veriut, duke e valëvitur atë. Zyrtarët që shoqërojnë sportistët në Olimpiadë kanë marrë urdhëra të rrepta që të mos lejojnë spotistët të mbajnë telefona celularë, të qëndrojnë gjatë gjithë kohës në Fshatin Olimpik dhe të mos takohen me persona të tjerë. Madje ata duhet të tregojnë burrëri e të mos qajnë në rast se marrin medalje, siç ndodhi me gjimnastin Ri Se-Gwang.
