Partia Demokratike ka reaguar sot për kritikat e Ambasadës Amerikane se ishte ajo që nuk u tregua felskibël në negociatat për reformën në drejtësi, duke bërë që të dështojnë negociatat.
Në një deklaratë për mediat, nënkryetari i Komisionit të Reformës në Drejtësi, Oerd Bylykbashi publikoi e-mailet e opozitës me Euralius dhe Opdat në lidhje me draftin final.
Bylykbashi tha se opozita ka qenë transparente dhe ajo që e ndan me mazhorancën është emërimi i këshillave të gjyqtarëve dhe të prokurorëve.
Bylykbashi tregoi se opozita, përmes Eduart Halimit, përzgjodhi një nga modelet e emërimit të gjyqtarëve dhe prokurorëve në këto këshilla, të propozuar nga Opdat, Euralius dhe “Venecia”.
Modeli që zgjodhi PD, sipas Bylykbashit është ai me emërimin e vendeve të rezervuara, ku 3 emërime t’i takonin mazhorancës dhe 2 opozitës.
Më datë 17 shkurt, sipas Bylykbashit Halimi dërgoi e-mailin që konfirmonte modelin në fjalë, por që më pas u kundërshtua nga kryeministri Rama.
“Sot po ju paraqes fakte dhe prova që provojnë qëndrimin fleksibël të PD. Emaili i datës 10 shkurt na paraqet një numër zgjidhjesh dhe propozimesh të emërimit të zyrtarëve të lartë edhe ajo që zgjodhi PD ishte modeli i vendeve të rezervuara.
Model i thjeshtë, që garantonte përfshirje substanciale i thjeshtë dhe më pak i korruptueshëm. Zgjodhëm modelin më të përshtatshëm…Në 21 prill pas daljes së raportit të Komisionit të Venecias ekspertët ndërkombëtarë bëjnë komunikimin e fundit…Këtë e kemi komunikuar në mënyrë transparente.
Në këtë pikë ka vijuar edhe negocimi. Çështja për emërimin e funksionarëve të organeve kolegjiale është e fundit dhe e vetmja që ndan palët, për ta bërë këtë paketë gati për votim. Edhe në 6 qershor ne bëmë transparente propozimet tona, duke detajuar modelin e vendeve të rezervura, por kryeministri doli me deklaratë të përgatitur kur tha se takimi dështoi.
Edhe pse opozita punoi fort për moskapjen nga mazhoranca të organeve kolegjiale..Këto fakte garantojnë fleksibilitetin e PD që ka bërë hapa para për të gjetur pikat e takimit.. E vetmja çështje është kjo, i vetmi që e pengon zgjidhjen është kryeministri”,- sqaroi më tej Bylykbashi.
