Me dhjetëra forca policie përfshirë dhe Shqiponjat dhe Ndërhyrjen e Shpejtë nxorën me dhunë familjarët Peci nga shtëpia e tyre private në zonën e liqenit të thatë në periferi të Tiranës. Për afro 3 orë ata kanë rezistuar duke kërcënuar madje edhe me vetevrasje, por policia vendosi të ndërhyjë me forcë për bastisjen e shtëpisë. Sakaq, INUK po largon plaçkat dhe ka afruar fadromat për shembjen e objektit.
Nga maja e çatisë ku kërcënonte me vetevrasje, Klajdi Peci u shpreh: E kemi ndërtuar në pronën tonë. Prona është e imja. Jeta ime është e rrezikuar në këtë vend. Nuk kam zgjidhje tjetër, të na shpërblejnë për truallin. Nuk kam ku të shkoj, nuk kam punë.
Vëllai i Klajdit: Unë jam banor i kësaj banese, e ndërtuar më 1995 në tokë private. Që kur doli vendimi për legalizimin e banesave pa leje kemi pritur legalizimin. Tani na vjen shkresa që thotë se ti përjashtohesh nga ALUIZNI, pasi është shpallur park. Unë jam pronar trualli, si mund të shpallet park. Tani na sjell urdhër prishje, punë tre ditësh. Ne duam të na shpronësohet trualli, të na jap lekët shteti dhe të lirojmë banesën. Ndryshe ne nuk e lirojmë shtëpinë. Bëhet fjalë për katër banesa, të gjithë në tokën e tyre. Pse nuk e presim procesin gjyqësor të rregullt, për çfarë nxitohen? Të vijnë zyrtarët e qeverisë këtu. Duan me na grabit pronën. Shkresa për largim nga banesa na erdhi më 25 janar?
Nuk është një shtëpi që do të shembet në këtë zonë. Janë disa, pasi Bashkia e Tiranës parashikon ndërtimi i një parku me pemë. Me lot në sy banorët kanë thënë se me këtë vendim po i varrosin, pasi nuk kanë shtëpi ku të fusin kokën.
